Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow duşenbe güni Eýranyň Prezidenti Masud Pezeşkian bilen telefon arkaly söhbetdeş boldy. Onuň barşynda EYR-niň döwlet Baştutany Halkara parahatçylyk we ynanyşmak ýyly mynasybetli 2025-nji ýylyň 12-nji dekabrynda Aşgabatda geçiriljek halkara foruma gatnaşmaga çagyryldy.

Türkmenistanyň resmi metbugatynyň habar bermegine görä, Gurbanguly Berdimuhamedow şol günde Türkmenistanyň hemişelik Bitaraplygynyň 30 ýyllygynyň hem bellenilýändigini, Eýranyň Prezidentiniň bu foruma gatnaşmagynyň bu çäräniň üstünlikli geçirilmegine möhüm goşant boljakdygyny belledi. Türkmenistanyň Halk Maslahatynyň bellemegine görä, ýakyn wagtda eýran tarapyna resmi çakylyk iberiler.

Söhbetdeşligiň dowamynda taraplar hoşniýetli goňşuçylyk we özara hormat goýmak ýörelgelerine esaslanýan türkmen-eýran gatnaşyklarynyň ýokary derejesini belledi. Türkmenistanyň Halk Maslahatynyň Başlygy Masud Pezeşkiany Eýranyň milli baýramy – Ynkylap güni bilen gutlady hem-de ýurduň dostlukly halkyna abadançylyk we gülläp ösüş arzuw etdi. Eýranyň döwlet Baştutany öz gezeginde hoşniýetli arzuwlar üçin hoşallyk bildirip, iki ýurduň arasynda hyzmatdaşlygy pugtalandyrmagyň möhümdigini belledi.

Taraplar ykdysady hyzmatdaşlygyň meselelerini hem ara alyp maslahatlaşdylar. Türkmen halkynyň Milli Lideri bilelikdäki hökümetara toparyň nobatdaky mejlisini geçirmegi, onuň gün tertibine energetika, ulag we senagat ýaly ulgamlarda hyzmatdaşlygy giňeltmek meselelerini girizmegi teklip etdi.

Söhbetdeşligiň ahyrynda taraplar umumy maksatlara we bähbitlere ýetmäge gönükdirilen ikitaraplaýyn hyzmatdaşlygy mundan beýläk-de ösdürmäge taýýardyklaryny tassykladylar.