Türkmenistanyň Prezidenti Serdar Berdimuhamedow sişenbe güni Aşgabatda Halkara sergiler býurosynyň Baş sekretary Dimitri Kerkentzesi kabul etdi. Duşuşygyň barşynda Baş sekretar Türkmenistan bilen däp bolan hyzmatdaşlygy ösdürmäge üýtgewsiz gyzyklanma bildirýändigini tassyklady.

Türkmenistanyň resmi metbugatynyň habar bermegine görä, taraplar ikitaraplaýyn hyzmatdaşlygy berkitmek meselelerini we ýurduň halkara sergilere gatnaşmak mümkinçiliklerini ara alyp maslahatlaşdylar.

Türkmenistanyň döwlet Baştutany abraýly halkara guramalar bilen hyzmatdaşlygyň ýurduň daşary syýasatynyň möhüm ugry bolmagynda galýandygyny nygtady.

Serdar Berdimuhamedow we Dimitri Kerkentzes özara bähbitli söwda-ykdysady hyzmatdaşlygy we dünýäde ykdysady işjeňligi ösdürmekde netijeli meýdança hökmünde halkara sergileriň möhüm ähmiýetini bellediler.

Ýaponiýanyň Osaka şäherinde geçiriljek “EKSPO-2025” Bütindünýä sergisine Türkmenistanyň gatnaşmagy jikmejik ara alnyp maslahatlaşyldy. Türkmenistanyň Prezidenti öz ýurdunyň bu abraýly halkara foruma işjeň gatnaşmagy meýilleşdirýändigini belledi.

Duşuşygyň ahyrynda Türkmenistanyň döwlet Baştutany Serdar Berdimuhamedow Halkara sergiler býurosynyň Baş sekretaryna işlerinde üstünlikleri arzuw edip, özara hyzmatdaşlygyň geljekde hem pugtalandyryljakdygyna ynam bildirdi.