Türkmenistan Aşgabat we Almaty şäherleriniň arasynda göni uçar gatnawlaryny 2025-nji ýylda gaýtadan dikeltmek mümkinçiligini öwrenýär. Bu barada Türkmenistanyň Ministrler Kabinetiniň ýanyndaky Ulag we kommunikasiýalar agentliginiň Baş direktory Mämmethan Çakyýewiň Gazagystanyň ulag ministri Marat Karabaýew bilen bolan duşuşygynyň jemleri boýunça mälim edildi.

Gazagystanyň Ulag ministrliginiň habar bermegine görä, uçar gatnawlarynyň gaýtadan dikeldilmegi iki ýurduň arasynda işewürlik we syýahatçylyk gatnaşyklarynyň işjeňleşmegine ýardam edip biler.

Gepleşikleriň dowamynda awtomobil ýollaryny ösdürmegiň meseleleri hem ara alnyp maslahatlaşyldy. Hususanda, Demirgazyk – Günorta ulag geçelgesi taslamasynyň çäklerinde Gazagystanyň Mangistau oblastynyň Žanaözen şäherinden Kenderliniň üsti bilen Türkmenistanyň serhedine çenli awtomobil ýol bölegini abatlamak işlerine badalga berler. Bu ýoluň uzynlygy 200 kilometre golaýlaýar.

Taraplar daşary ýurt sürüjileri üçin rugsat hatlaryny resmileşdirmek işini sanlylaşdyrmak boýunça ylalaşdylar. Munuň özi ýükleriň resminama işlerini ýeňilleşdirmäge hem-de üstaşyr ýük akymlarynyň möçberlerini artdyrmaga ýardam eder.

Söhbetdeşler ulag ulgamynda hyzmatdaşlygy mundan beýläk-de pugtalandyrmaga özara gyzyklanma bildirýändiklerini tassykladylar.

Gazagystan awtoulag geçiriş nokatlaryny, şol sanda Türkmenistan bilen serhetde ýerleşýän nokady döwrebaplaşdyrmak işini dowam edýär.