2024-nji ýylda Türkmenistanyň Aýlag Hyzmatdaşlyk Geňeşine (AHG) agza ýurtlar bilen söwda dolanyşygy 2020-nji ýyl bilen deňeşdirilende 9,9 esse artdy. Bu barada sişenbe güni Ýewraziýa ösüş banky (ÝÖB) habar berdi.

ÝÖB-niň berýän maglumatlaryna görä, Türkmenistan AHG ýurtlary bilen söwda hyzmatdaşlygy boýunça Merkezi Aziýa döwletleriniň arasynda öňdebaryjy orny eýeleýär. 2024-nji ýylda Türkmenistanyň bu ýurtlar bilen söwda dolanyşygy 2 milliard ABŞ dollaryna ýetip, sebit boýunça iň ýokary görkeziji boldy.

Umuman, Merkezi Aziýanyň AHG ýurtlary bilen söwda dolanyşygy jemi 3,3 milliard ABŞ dollaryna barabar boldy. Bu bolsa 2020-nji ýyldaky görkezijiden 4,2 esse ýokarydyr.

Aýlag ýurtlarynyň arasynda Merkezi Aziýa bilen söwdada iň iri hyzmatdaş hökmünde Birleşen Arap Emirlikleri (BAE) çykyş edýär. Merkezi Aziýa ýurtlary bilen söwdanyň esasy bölegi — 97%-e golaýy — Birleşen Arap Emirlikleriniň paýyna düşýär.

ÝÖB-niň analitikleriniň bellemegine görä, Merkezi Aziýa ýurtlarynda metallurgiýa hem-de oba hojalyk önümleriniň eksportyny giňeltmek üçin uly mümkinçilikler bar. Aýlag ýurtlary bolsa awtoulaglar, elektrik enjamlary we gymmat bahaly daşlardan ýasalan şaý-sepler ýaly harytlaryň importyna gyzyklanma bildirýärler.

Aýlag Hyzmatdaşlyk Geňeşi 1981-nji ýylda döredilen sebitara, hökümetara syýasy-ykdysady birleşik bolup, onuň düzümine Bahreýn, Kuweýt, Oman, Katar, Saud Arabystany hem-de Birleşen Arap Emirlikleri girýär. Geňeşiň baş edarasy Saud Arabystanyň paýtagty Er-Riýadda ýerleşýär.