Aşgabatda geçirilýän “Türkmenistanyň nebiti we gazy” (OGT-2024) halkara maslahatynyň dowamynda Türkmenistanyň wekilleri “Petronas”, CNPC, “Lukoýl” we “KazMunaýGaz” kompaniýalarynyň wekiliýetleri bilen duşuşyklary geçirdiler. Taraplar Türkmenistanyň energetika pudagyna maýa goýumlary çekmegi we öňdebaryjy tehnologiýalary ornaşdyrmagy öz içine alýan bilelikdäki taslamalar üçin ugurlary ara alyp maslahatlaşdylar. 

Türkmenistanyň resmi metbugatynyň çarşenbe güni habar bermegine görä, duşuşyklara gatnaşanlar Türkmenistan üçin ileri tutulýan ugurlar bolmagynda galýan durnukly ösüş we energiýanyň gaýtadan dikeldilýän çeşmelerine geçmek meselelerine üns berdiler. 

Halkara kompaniýalaryň wekilleri dünýäniň energetika bazarynda Türkmenistanyň eýeleýän möhüm ornuny nygtamak bilen hyzmatdaşlygy çuňlaşdyrmaga taýýardyklaryny aýtdylar. Bu gepleşikler energetika howpsuzlygyny we durnukly ösüşi pugtalandyrmakda hyzmatdaşlyk gatnaşyklaryny giňeltmäge Türkmenistanyň tagalla edýändigini tassyklaýar. 

Şeýle hem şol gün “Türkmengaz” döwlet konserniniň başlygy Maksat Babaýew Bütindünýä bankynyň Türkmenistandaky we Gazagystandaky hemişelik wekili Andreý Mihnew bilen duşuşdy. Taraplar ikitaraplaýyn hyzmatdaşlygy işjeňleşdirmegiň ýollaryny maslahatlaşdylar.

25 Oktýabr, 2024 ý.