Mongoliýanyň Prezidenti Uhnaagiýn Hurelsuh Türkmenistanyň Prezidenti Serdar Berdimuhamedowy döwlet sapary bilen öz ýurduna gelmäge çagyrdy. Bu barada U.Hurelsuhiň Türkmenistanyň döwlet Baştutanyna hoşallyk bildirip ugradan hatynda bellenilýär.

U.Hurelsuh öz hatynda Aşgabada bolan saparynyň dowamynda wekiliýet düzüminiň mähirli kabul edilendigi üçin hoşallyk bildirip, Türkmenistanyň Beýik Ýüpek ýolunyň çatyrygynda Aziýany we Ýewropany birleşdirýän esasy merkez bolup durýandygyny belledi. Bu barada Türkmenistanyň resmi metbugaty anna güni habar berdi.

U.Hurelsuh özüniň amala aşyran sapary barada durup geçmek bilen, özüneçekiji gözel tebigaty we baý medeniýeti bolan Türkmenistany Merkezi Aziýanyň “Ak ertekisi” diýip atlandyrdy. Ol şeýle hem Gündogar edebiýatyna uly täsirini ýetiren Magtymguly Pyragynyň doglan gününiň 300 ýyllygy mynasybetli geçirilen çärelere özüniň gatnaşandygyna örän şatdygyny belledi.

Mongoliýanyň Prezidenti gepleşikleriň ýakymly we netijeli ýagdaýda üstünlikli geçirilendigini nygtady. Olaryň jemleri boýunça döwletara gatnaşyklary we hyzmatdaşlygy hakynda Bilelikdäki Beýannama kabul edildi.

U.Hurelsuh iki ýurduň hökümetleriniň arasynda hukuk binýady kesgitleýän resminamalara gol çekilmeginiň oba hojalygy, ulag, syýahatçylyk we medeniýet ýaly ugurlarda özara ykdysady gatnaşyklary ösdürmäge şert döretjekdigini belledi.

Mongoliýanyň Prezidenti hatynyň soňunda gatnaşyklaryň mundan beýläk-de pugtalandyryljakdygyna ynam bildirip, Serdar Berdimuhamedowa berk jan saglyk, bagtyýarlyk, Türkmenistanyň halkyna bolsa gülläp ösüş arzuw etdi.