“Balkan” gämi gurluşyk we abatlaýyş zawody” AGPJ, Türkmenistanyň gämi gurluşygyna innowasion tehnologiýalary ornaşdyrmak bilen yzygiderli öňe barýar. Häzirki wagtda zawodda ýük göterijiligi 6100 tonna bolan iki sany gury ýük gämilerini gurmak boýunça uly göwrümli taslamany durmuşa geçirýär. Bu taslama diňe ýurdumyzyň deňiz flotunyň kuwwatlygyny giňeltmek bilen çäklenmän, gämi gurluşyk pudagyny ösdürmekde hem möhüm ädim bolup durýar.

Günorta Koreýanyň “Koryo Shipbuilding Industry Technology Co. Ltd.” kompaniýasy bilen hyzmatdaşlyk “Balkan” zawodyna halkara standartlaryna laýyk gelýän gämi gurluşyk tehnologiýalaryny we hil dolandyryş ulgamlaryny ornaşdyrmaga mümkinçilik berdi. Bu bolsa öz gezeginde, gurulýan gämileriň ýokary hilini we ygtybarlylygyny kepillendirýär.

2024-nji ýylyň 11-nji noýabrynda gämi gurluşygynda möhüm tapgyra ýetildi – gurulýan gämileriň ilkinji bloklary gurluşyk meýdançasyna çykaryldy. Bu tapgyr zawodyň hünärmenleriniň ýokary hünärleriniň we ulanylýan tehnologiýalaryň netijeliliginiň subutnamasy bolup durýar. Geljekki meýilnamada gämileriň gabara bölekleriniň gurulmagy, mehanizmleri we enjamlary oturtmagy, şeýle hem gäminiň doly gurluşygyny we enjamlaşdyrmagy öz içine alýar.

Şeýle hem, ilkinji gäminiň kiliniň düýbüni tutmak çäresi 2025-nji ýylyň ýanwar aýynda meýilleşdirilendigini habar berýäris.