Penşenbe güni Aşgabat şäherinde telearagatnaşyk, telemetriýa, habar beriş tilsimatlaryna we teleradioýaýradyş enjamlaryna bagyşlanan “Türkmentel-2024” atly XVII halkara sergisi we ylmy maslahaty açyldy. 

Türkmenistanyň Prezidenti Serdar Berdimuhamedow serginiň açylmagy mynasybetli oňa gatnaşyjylara we guramaçylara iberen gutlag hatynda telearagatnaşyk pudagynda hyzmatdaşlygy ösdürmegiň möhüm ähmiýetini belledi. “Häzirki döwürde milli telekommunikasiýa ulgamynda halkara ölçeglere laýyk gelýän täze innowasion sanly tehnologiýalary we maglumat aragatnaşyk enjamlaryny ornaşdyrmak işleri üstünlikli amala aşyrylýar. Şunuň bilen baglylykda, aragatnaşyk edara-kärhanalaryny döretmek we döwrebaplaşdyrmak üçin düýpli maýa goýumlar gönükdirilýär. Bäsdeşlige ukyply häzirki zaman aragatnaşyk hyzmatlarynyň hil taýdan täze derejesini döretmek we ilata hödürlemek boýunça yzygiderli işler alnyp barylýar. Bu ugurda ýokary derejeli hünärmenleri taýýarlamaga hem uly üns berilýär” diýip, Türkmenstanyň döwlet Baştutany belleýär. Bu barada Türkmenistanyň resmi metbugaty habar berýär. 

Foruma “Amazon Project Kuiper”, “SpaceX”, “Ozon Marketpleýs Kazakhstan”, “Dell Technologies”, “EUROPEAN NETWORKS”, “Eastwind”, “Huawei”, “Samsung” ýaly dünýäniň öňdebaryjy kompaniýalary gatnaşýarlar.

“Türkmentel-2024” forumy tejribe alyşmak, sanly ykdysadyýet, kiberhowpsuzlygy, hemra aragatnaşygy, “5G” ulgamynyň ösdürilmegi ýaly möhüm ugurlary maslahatlaşmak üçin amatly meýdançany hödürleýär. 

Çäräniň maksatnamasy poçta hyzmatlaryny sanlylaşdyrmak boýunça ýöriteleşdirilen okuw maslahatlaryny we ýaş IT hünärmenleriň innowasion taslamalarynyň bäsleşigini öz içine almagy tehnologiýa pudagyny ösdürmäge toplumlaýyn çemeleşilýändigini görkezýär. 

Türkmen we halkara hünärmenleriň arasynda täze hyzmatdaşlyk gatnaşyklary ýola goýmak üçin netijeli meýdança öwrüljek “Türkmentel-2024” forumy sebitde telearagatnaşyk pudagynyň ösdürilmegine ýardam eder. 

Türkmenistanyň Söwda-senagat edarasynda geçirilýän çäre 16-njy noýabra çenli dowam eder.