Türkmenistan bilen Ýewropa Bileleşigi Türkmenistanyň ileri tutulýan ulag taslamalaryna we halkara hyzmatdaşlyk arkaly olary maliýeleşdirmek meselelerine garadylar.

Türkmenistanyň Belgiýadaky ilçihanasynyň habar bermegine görä, bu maslahatlaşma çarşenbe güni ÝB-niň Hazarüsti ulag geçelgesini ösdürmek boýunça utgaşdyryjy platformasynyň çäklerinde sanly ulgam arkaly guralan okuw maslahatynyň dowamynda geçirildi.

Çärä Türkmenistanyň döwlet edaralarynyň, şol sanda Ulag we kommunikasiýalar agentliginiň we “Türkmendemirýollary” agentliginiň, Aziýa Ösüş banky, Ýewropanyň Täzeleniş we ösüş banky ýaly halkara maliýe düzümleriniň wekilleri hem-de diplomatlar gatnaşdylar.

Okuw maslahatyň dowamynda oňa gatnaşyjylar Hazarüsti ulag geçelgesiniň üstaşyr mümkinçiliklerini ýokarlandyrmak we Ýewropa bilen Merkezi Aziýa ýurtlarynyň gatnaşyklaryny berkitmek üçin ulag düzümlerini mundan beýläk-de ösdürmegiň zerurdygyna ünsi çekdiler.

Hazarüsti ulag ugry (ýa-da Hazarüsti ulag geçelgesi) – bu Hazar deňzi arkaly Merkezi Aziýa ýurtlaryny Ýewropa bazarlary bilen özara baglanyşdyrýan halkara ulag geçelgesidir. Bu ulag geçelgesi demir we awtomobil ýollary hem-de deňiz daşamalary ýaly birnäçe möhüm ulag bölekleri özünde jemleýär.