Anna güni, 27-nji dekabrda Türkmenistanyň Prezidenti Serdar Berdimuhamedow Ministrler Kabinetiniň we Döwlet howpsuzlyk geňeşiniň giňişleýin mejlisini geçirdi. Mejlisiň dowamynda 2025-nji ýyl ýurtda “Halkara parahatçylyk we ynanyşmak ýyly” diýlip resmi ýagdaýda yglan edildi. 

Bu şygar halkara bileleşigiň goldamagynda Türkmenistanyň başlangyjynyň çäklerinde teklip edildi. 2024-nji ýylyň 21-nji martynda Birleşen Milletler Guramasynyň Baş Assambleýasy Türkmenistanyň Prezidentiniň başlangyjy bilen, 86 döwletiň awtordaş bolup çykyş etmeginde 2025-nji ýyly «Halkara parahatçylyk we ynanyşmak ýyly» diýip biragyzdan yglan etdi.

D.Gulmanowa geljek ýylyň şygaryny we nyşanyny kesgitlemek boýunça ýerine ýetirilen işleriň netijeleri barada maglumat berdi. Ýurdumyzyň jemgyýetçilik birleşiklerinden gelip gowşan teklipleriň esasynda, 2025-nji ýyly «Halkara parahatçylyk we ynanyşmak ýyly» diýip atlandyrmak barada Mejlisiň karary taýýarlanyldy. Şeýle hem geljek ýylyň nyşany hödürlenildi.

Hormatly Prezidentimiz 2025-nji ýylyň Türkmenistan üçin möhüm bolup, hemişelik Bitaraplygynyň 30 ýyllygynyň giňden bellenilip geçiljekdigini, bu şanly sene mynasybetli ýurdumyzda we dünýä döwletlerinde birnäçe halkara çäreleri geçirmegiň meýilleşdirilýändigini aýtdy. Halkara parahatçylyk we ynanyşmak ýyly mynasybetli dabaralary we çäreleri ýokary derejede geçirmek boýunça Guramaçylyk döwlet toparynyň döredilendigini nygtap, bu topara Türkmenistanyň Halk Maslahatynyň ýolbaşçylyk etmeginiň maksadalaýyk boljakdygyny belledi. 

Prezident Türkmeinstanyň daşary syýasatynyň binýady bolup durýan parahatçylykly ýaşaýşyň we dialogyň filosofiýasyny dowam etjekdigini belledi.