Hormatly Prezidentimiziň taýsyz tagallalary bilen, ýurdumyzy ykdysady taýdan ösdürmek, ulag toplumynyň gerimini we mümkinçiligini giňeltmek, hususanda deňiz we derýa ulaglarynyň kuwwatlygyny ýokarlandyrmak şeýle hem ýurdumyzda täze agyr senagaty bolan gämi gurluşyk pudagyny ösdürmekde edýän tagallalaryna bilen, 2023-nji ýylyň 31-nji awgustynda Türkmenistanyň Prezidentiniň 680 belgili «Gury ýük gämilerini gurmak hakynda» we şertnama baglanyşmaga ygtyýar bermek hakynda kararyna laýyklykda 2023-nji ýylyň 13-nji sentýabrynda, «Balkan» gämi gurluşyk we abatlaýyş zawody bilen Günorta  Koreýanyň «Koryo Shipbuilding Industry Technology Co., Ltd.» kompaniýasynyň arasynda Ýük göterijiligi 6100 tonna bolan iki sany gury ýük gämilerini bilelikde gurmak barada şertnama gol çekildi. Agzalýan resminama Türkmenistanyň ulag ulgamynyň maddy-enjamlaýyn binýadyny kämilleşdirmek maksady bilen kabul edildi.

Şeýlelikde, 2024-nji ýylyň awgust aýynda ilkinji gämileriň gurluşygyna başlanyp, 2024-nji ýylyň 11-nji noýabrynda gämi gurluşygynda möhüm tapgyra ýetildi – gurulýan gämileriň ilkinji bloklary gurluşyk meýdançasyna çykaryldy. Bu tapgyr zawodyň hünärmenleriniň ýokary hünärleriniň we ulanylýan tehnologiýalaryň netijeliliginiň subutnamasy bolup durýar.

Şunuň bilen baglylykda, 2025-nji ýylyň 6-njy ýanwarynda «Balkan» gämi gurluşyk we abatlaýyş zawody» açyk görnüşli paýdarlar jemgyýetinde ilkinji gäminiň «Keel Laying» dabarasy geçirildi. Dabara «Balkan» gämi gurluşyk we abatlaýyş zawodyň ýolbaşçylary hem-de zawodyň hyzmatdaş kompaniýasy bolan, Günorta Koreýanyň  «Koryo Shipbuilding Industry Technology Co., Ltd.» kompaniýasynyň Prezidenti  Choi Young Uook  hem gatnaşdy.

«Keel Laying» dabarasy, täze gäminiň gurluşygynyň başlangyjy bolan dabaraly waka bolup, bu waka geçmişden şu güne çenli gämileriň gurluşygynda iň möhüm wakalaryň biridir. Bu dabara täze gäminiň döremegini alamatlandyrýan gämi gurluşygynyň örän ähmiýetli tapgyry bolup, ýurdumyzyň gämi gurluşyk pudagynda ýetilen sepgitleriniň hem aýdyň nyşany bolup durýar.