Türkmenistanyň Daşary işler ministri Raşid Meredow 22-nji sentýabrda Nýu-Ýork şäherinde BMG-niň Baş Assambleýasynyň 80-nji sessiýasynyň çäklerinde ABŞ-nyň Döwlet sekretarynyň orunbasary Kristofer Landau bilen duşuşyk geçirdi. Bu barada Türkmenistanyň DIM-i habar berýär.

Duşuşygyň dowamynda taraplar ikitaraplaýyn gatnaşyklarynyň häzirki ýagdaýyny we geljekki mümkinçiliklerini ara alyp maslahatlaşdylar. Söwda-ykdysady hyzmatdaşlygy ösdürmek, şol sanda maýa goýumlary we tehnologik ugurlar aýratyn üns merkezinde boldy.

Duşuşykda ABŞ-nyň öňdebaryjy kompaniýalaryny birleşdirýän we işewür gatnaşyklaryň giňelmegine ýardam berýän “Türkmenistan — ABŞ” işewürlik geňeşiniň ähmiýeti nygtaldy. Şeýle-de, taraplar özara gyzyklanma döredýän halkara we sebit meseleleri boýunça pikir alyşdylar.

Şeýle hem, 2025-nji ýylyň 20-nji awgustynda Türkmenistanyň Ministrler Kabinetiniň Başlygynyň orunbasary, Daşary işler ministri Raşid Meredow Waşington şäherinde ABŞ-nyň Döwlet sekretary Marko Rubio bilen duşuşyk geçirdi.