6-njy oktýabrda Türkmenistanyň Italiýa Respublikasyndaky Adatdan daşary we Doly ygtyýarly ilçisi Toýly Kömekow bilen Italiýanyň “Italiýada öndürilen” önümler we kärhanalar boýunça ministri Urso Adolfonyň arasynda duşuşyk geçirildi.

Gepleşikleriň dowamynda taraplar Türkmenistanyň hem-de Italiýanyň iri hususy işewür toparlarynyň, döwlet edaralarynyň, maliýe we ykdysady toparlarynyň wekilleriniň, şeýle hem iri italýan kompaniýalarynyň gatnaşmagynda geçiriljek işewürlik forumyny guramak meselelerini ara alyp maslahatlaşdylar. Forumyň şu ýylyň oktýabr aýynda Italiýa Respublikasynda geçirilmegi meýilleşdirilýär.

Mundan başga-da, duşuşykda halkara guramalarynyň çäklerinde ikitaraplaýyn hyzmatdaşlygy berkitmegiň we söwda-ykdysady gatnaşyklary ösdürmegiň mümkinçilikleri boýunça pikir alyşmalar boldy. Şeýle hem iki ýurduň degişli pudaklaýyn edaralarynyň ýolbaşçylarynyň gatnaşmagynda dürli çäreleri geçirmegiň meýilnamalaryna aýratyn üns berildi.

Duşuşygyň ahyrynda taraplar Türkmenistanyň we Italiýanyň halklaryna parahatçylyk, ösüş we rowaçlyk dileglerini beýan etdiler hem-de iki döwletiň arasyndaky hyzmatdaşlygyň mundan beýläk-de berkidilmeginiň ähmiýetini nygtadylar.