Türkmenistanyň Prezidenti Serdar Berdimuhamedow anna güni sanly ulgam arkaly geçirilen Ministrler Kabinetiniň nobatdaky mejlisinde “Döwlet zerurlyklary üçin harytlar bilen üpjün etmek, işleri ýerine ýetirmek, hyzmatlary etmek boýunça bäsleşikler hakynda” Türkmenistanyň Kanunyna laýyklykda Karara gol çekdi. Bu barada Türkmenistanyň resmi metbugaty habar berýär.

Resminama laýyklykda, ulag we aragatnaşyk toplumyna degişli ministrlikleriň we pudaklaýyn dolandyryş edaralarynyň zerurlyklary üçin harytlar, işler we hyzmatlar bilen üpjün edijileri saýlap almak boýunça bäsleşikleri geçirmegiň tertibi tassyklanyldy.

Mejlisiň dowamynda Ministrler Kabinetiniň Başlygynyň orunbasary Batyr Annaýew ulag we aragatnaşyk toplumynyň işini kämilleşdirmek boýunça alnyp barylýan işler barada hasabat berdi. Onuň bellemegine görä, toplumyň maddy-tehniki binýady yzygiderli pugtalandyrylýar, şeýle hem kadalaşdyryjy hukuk binýadyny döwrüň talaplaryna laýyk getirmek boýunça degişli işler durmuşa geçirilýär. Şunuň bilen baglylykda, wise-premýer döwlet Baştutanynyň garamagyna degişli teklibi hödürledi.

Türkmenistanyň Prezidenti hasabaty diňläp, ulag we aragatnaşyk toplumynyň ýurduň ykdysadyýetinde möhüm orun eýeleýändigini belledi. Döwlet Baştutany bu ugurda taýýarlanan Karara gol çekip, ulag we aragatnaşyk toplumyna degişli ministrlikleriň hem-de pudaklaýyn dolandyryş edaralarynyň işini kämilleşdirmek boýunça degişli tabşyryklary berdi.

Mejlisde döwlet durmuşyna degişli başga-da birnäçe möhüm meselelere seredildi we olar boýunça degişli çözgütler kabul edildi.

Çeşme : https://business.com.tm/