Türkmenistan hem-de Garaşsyz Döwletleriň Arkalaşygyna (GDA) agza döwletler sebitde howa giňişligini ulanmagyň netijeliligini ýokarlandyrmaga we uçuşlaryň utgaşdyrylyşyny kämilleşdirmäge gönükdirilen “Eurasiacontrol” bitewi aeronawigasiýa utgaşdyryş merkezini döretmek taslamasyny ara alyp maslahatlaşdylar. Bu barada Döwletara awiasiýa komitetiniň metbugat gullugy habar berdi.

Döwletara awiasiýa komitetiniň meýdançasynda geçirilen Aeronawigasiýa boýunça utgaşdyryjy toparyň 27-nji mejlisinde “Eurasiacontrol” taslamasyna aýratyn üns berildi.17-nji iýunda gibrid formatda geçirilen mejlise Türkmenistanyň, Belarusiýanyň, Gazagystanyň, Gyrgyzystanyň, Täjigistanyň we Özbegistanyň awiasiýa edaralarynyň hem-de aeronawigasiýa hyzmatlaryny üpjün edijiler, şeýle hem Russiýanyň we Howa ulaglarynyň Halkara assosiasiýasynyň (IATA) bilermenleri gatnaşdylar.

Mejlisiň dowamynda GDA-nyň bitewi aeronawigasiýa giňişligini döretmek meselelerine garaldy we “Eurasiacontrol” taslamasynyň konsepsiýasy ara alnyp maslahatlaşyldy. Gatnaşyjy döwletleriň, şol sanda Türkmenistanyň wekilleri başlangyjyň ähmiýetini belläp, howa giňişligini ulanmakda sebitara hem-de serhetüsti utgaşdyrmagyň möhümdigini bellediler.

Duşuşyga gatnaşyjylaryň bellemegine görä, taslamanyň durmuşa geçirilmegi awiakompaniýalar üçin uçuşlary meýilleşdirmegi ýeňilleşdirer, howa giňişligini ulanmagyň utgaşyklylygyny berkider we iň amatly howa ugurlaryny saýlamaga mümkinçilik döreder.

Mejlisiň jemleri boýunça gatnaşyjylar taslama degişli resminamalary goşmaça öwrenmegiň we olary gatnaşyjy döwletlerde ylalaşmagyň zerurdygyny bellediler. Şeýle hem taslamany durmuşa geçirmek boýunça ýol kartasyny taýýarlamak maksady bilen utgaşdyryjy toparyň çäklerinde bilermenlerden ybarat iş toparyny döretmek meýilleşdirilýär.

Çeşme : https://business.com.tm/