Türkmenistanyň çäginden üstaşyr geçirilen ýükleriň umumy möçberi 3,5 million tonnadan geçip, geçen ýylyň degişli döwri bilen deňeşdirilende 15 göterim ýokarlandy hem-de ýurduň çäginden 94 ýurda üstaşyr ýük daşaldy. Bu barada Türkmenistanyň Döwlet gümrük gullugy anna güni habar berdi.

Hasabat döwründe Türkmenistanyň çäginden geçýän halkara ulag geçelgelerindäki gümrük nokatlarynda geçirilen ýük dolanyşygy 2026-njy ýylyň ilkinji alty aýynda 10,5 million tonnadan geçip, geçen ýylyň degişli döwri bilen deňeşdirilende 10 göterim ýokarlandy.

Habarda bellenilişi ýaly, halkara ulag geçelgeleriniň ugrundaky gümrük nokatlary tapgyrlaýyn döwrebaplaşdyrylýar. Şeýle hem olaryň ulag we ýük geçirijilik kuwwaty ýokarlandyrylýar hem-de gümrük amallarynda sanly ulgamlaryň mümkinçilikleri giňden ornaşdyrylýar.

Döwrebap barlag enjamlary bilen üpjün edilen serhetýaka gümrük nokatlarynda awtoulag serişdeleri ilkinji giren pursadyndan başlap, gümrük amallarynyň ýerine ýetirilişi sanly ulgam arkaly gözegçilikde saklanylýar. Bu bolsa gümrük nokatlarynyň çäklerinde gümrük amallarynyň ýerine ýetirilmegi üçin sarp edilýän wagty ep-esli azaltdy.

Çeşme: https://business.com.tm